drt4w4gw

للبقيع احساسي حوّل رايد ازياره .. رايد ابشوقه يتمشّى وياخذ اخباره
شوقه يذبح والزياره وش كثر صعبه .. من توصّل كل قبر حاطته احجاره

لا هي قبه ولا مناره .. كل قبر هتكوا ستاره
مارعوا طه وبنينه .. كل قبر هدموا مزاره

حالته والله انها تصعب والعدا هم حاطته
والنوايا اموضّحه وهم تشعر انها امبيّته
مو أمام الا له اعدا والقبر هم عادته
شنهو ذنبك يا قبر . وانته شايل جثّته

.....................
لو تركته في البراري .. ياقبر ما يهدمونك
يمكن اتحصّل مكانه .. ويمكن الاعدا يجونك ..
ويقصدونك في زياره .. وحتى تالي ايزينونك ..
واختيارك تحوي جسمه .. حُكمك إنهم يعدمونك ..

يا قبر لا تخاف احنا ما نبتعد ..
لا تظن فينا لو لحظه او تعقد ..
احنا لو طالت الغيبه لك نستعد ..
حط فبالك نجي فوج ومو بس فرد ..
.......................
لزياره ما ننسى .. نظل نشتاق في كل مرّه ..
والشّوق إذا عشعش  .. يكوّن في القلب سفره  ..
والشيعي الـ حُبه .. يفدّي ويرخص ابعمره ..
وهالنوب إذا اشواقه .. زياره لخاطر الزهرا ..

لان الزياره فاطمه .. واهل البقيع التفهمه ..

كل زاير ابحنينه يتعنّى فاطم ..
ما يدري بالقبر لاكن ليها قادم ..

بعد البتوله للبنين .. وتالي نجي لام البنين ..

هذا اشتياقي مو بس إني اسافر ..
واقصد زياره حتى بدون المناير ..



كل زمن نلقى المصايب والصبر مرسى .. وكل فرد منكم يسلّي بالحزن نفسه ..
والصبر ما يحتمل هالمره في صبره .. لو هو ينسى كل مصيبه الليله ما ينسى ..

لو توصّف ما توصفه .. يبقى في كِفّه ويا كِفّه ..
مدري وشلون احجّي عنّه  .. والالم في قلبي نزفه ..

إنته ارسم في خيالك لوحه ممليه حزن ..
وامسك الريشه ابحنانك وانتبه ونته توّن ..
خلي حرمه بالهوازل تمشي بالحسره تحن ..
وارسم الطاغي يقود الحرمه الذاك الوطن ..
..................
يعني هالرسمه تظنها .. حرمه تمشي بس غريبه ..
لو هي تعني إن حرمه .. للهزل ظلت قريبه ..
لو خيالك من رسمها .. فكّر الحرمه سليبه ..
يعني تدري ان زينب .. من مصيبه لمصيبه ..

بس أنا ما عنيت السبي من زمن ..
أعني الـ لي تعيش حسره وآهات ومحن ..
لا تخلوها في غُربه يكفيها حزن ..
عمتي لا تنسبي كونوا ليها وطن ..
...........................

يكفيها ما قاست .. اويلي كربلا صعبه ..
لا تبقى هالحوره .. في غربه من بعد غُربه ..
داروها ما تقدر .. تراها للمحن كعبه ..
لا تنسبي زينب .. وصحنها ابقوا ابقربه ..

حال العقيله نعلمه .. والمرقد الله سلّمه ..

لا تتركوها زينب لحظه وحيده ..
يكفي المصايب الّي مرّت شديده ..

حاموا عن الحوره بفخر .. وعند الله حسوب الاجر ..

الله يسجل الي يحمي العقيله ..
لانها إلى الله كانت اجمل وسيله ..



ليله مخسوف القمر فيها ولا نشوفه .. لو إله اجّفوف القمر يتغطى ابجّفوفه ..
السما هالليله مارادت بعد يظهر .. لو هو يظهر هالسما في لحظه اتعوفه ..

سودا الوان السحايب .. حامله هموم ونوايب ..
كل شي هالليله تغيّر .. من مصايب لـ مصايب ..

يعني يدري هالقمر الليله موعد موتته ..
والسحايب تدري عنه والحزن له لبسته ..
يعني كل شي في الزمن يخجل بعد من شوفته ..
كيف اذا ابنعشه الملايك هالمسا من شالته ..
........................
من يشيله ومن يعزيه .. والمدامع تجري حسرات ..
هذا نوحه من ينادي .. اهتزت اركان السموات ..
اواحد ابآهات يصرخ .. وتعتلي بالبلوه زفرات ..
اواحد ابهمه اوعذابه .. اتمنى قبله ابحسرته مات ..

وارتفع هالنعش ويلي كلّه حزن ..
كبّر الناعي من صوته الدنيا توّن ..
كل موالي إله ابقلبه هم وشجن ..
يرحل العابد وبعدما ظل وطن ..
...................................
واحنا نحبه هم .. وننصب ماتم الـ روحه ..
وننعى مع الدمعه .. وكل شيعي اله نوحه ..
والمهجه للغالي .. تظل في حسره مبحوحه ..
لان الي يبجّي اعليه .. دموعه بلسم اجروحه ..

ننعى على حال الولي .. الله أكبر يا علي ..

كلنا نودعه بالدمعه الجريه ..
وما تنتهي بعد أحزاني المسيّه ..

نبجّي على فقد الولي .. نصرخ وداعاً ياعلي ..

صرخة حزن بعد مسموعه ابألمها ..
وهالصرخه للابد ماتمنا يضمها ..



الامام ابعلمه خط أسمى رسالاته .. ما كتبها الا لجل الله ومرضاته ..
ما كتبها لن يذكر كل بطولاته .. حشى هالغيره أبد لا ماهي عاداته ..

خطها للناس ابزمانه .. كاتب احساس ابأمانه ..
فيها نتعلم تفاصيل .. ومنها نتعلّى مكانه ..

فيها نعرف منهو الجار وحقوقه الغايبه ..
مو من احقوقه يـ خويه في زمانك تسلبه ..
لا ولا تغتابه لو غايب ولا تستعتبه ..
تحفظه في غيبته وفي حضرته هم تقربه ..
......................
وفيها هم حق للمعلم .. وكيف يبقى له احترامه ..
وله مكانه في حضوره .. وفي غيابه له مقامه ..
ما تسيئ ابشخصه مرّه .. وما تعاديه ابكلامه ..
خله ورده واحتظنها .. وحافظ اعليها ابسلامه ..

لا تقول من يقول هذا صادق صفاته ..
انته لك قلب وعين واكتشف توصياته ..
لا تِظن في أحد وتمحي له سيئاته ..
إعرف انته الأمر واخذه من كل جهاته ..
.............................
وهم في رسالاته .. إلى الام وقفه بالشدّه ..
لا تنسى يا خويه .. في احشاها كم المدّه ..
ولو انته في غُربه .. تحاتي دايم العوده ..
ولو هو مرض صابك .. تظل الجرحك اتضمده ..

رحمه من الله امنزّله .. وعدها الصبر من كربلا ..

حقها يخويه ما تنساها ابكبرها ..
وهيا الي لك بعد تعبت في عمرها ..

واجب نداريها ابحنان .. وما ننسى ايام الزمان ..

كانت تجوع وتطعمنا في العمر ..
لابد بعد تعبها تلقى الأجر ..